تنسيق جلسات الحوش هو اللي يحدد إذا الحوش بيصير مكان تقعد فيه العايلة كل ليلة، أو مساحة تطلع لها مرة في الشهر. وكثير ناس يشترون كنب خارجي حلو ويحطونه في أي زاوية، وبعدها يكتشفون إن الشمس تضرب فيه العصر، أو إن الجيران يشوفون الجلسة، أو إن الطريق للمطبخ بعيد. التنسيق الصح يبدأ قبل الكنب: وين مكان الجلسة، وش يغطيها، وكيف ترتبط بباقي الحوش. في هالمقال نعطيك أفكار تصاميم حقيقية لجلسات الحوش، وكيف تنسقها مع الحديقة والممرات والإضاءة، والأخطاء اللي نشوفها كثير في المعاينات.
١. وين تحط الجلسة في الحوش؟
قبل أي تصميم، امش في حوشك في أوقات مختلفة من اليوم وراقب ثلاث أشياء: الشمس، الخصوصية، والحركة.
- الشمس والظل: الجلسة اللي تستخدمها العصر والمغرب تحتاج مكان يجيه ظل الجدار أو البيت في هالوقت. الجهة اللي تضربها شمس الغروب مباشرة تحتاج مظلة أو برجولة من البداية.
- الخصوصية: شوف الجلسة من شبابيك الجيران ومن باب الشارع. لو مكشوفة، فكر في جدار أخضر أو شرائح خشب قبل ما تفكر في الأثاث.
- القرب من البيت: الجلسة اللي قريبة من المطبخ أو المجلس تنستخدم أكثر، لأن الشاي والأكل يوصل بسهولة. الجلسة اللي في آخر الحوش تحتاج ممر واضح ومضاء عشان ما تنهجر.
- الهوا والغبار: الزاوية اللي محمية من اتجاه الريح أريح بكثير في أيام الغبار.
لما تحدد المكان على هالأساس، يصير باقي التنسيق أسهل بكثير.
٢. أفكار تصاميم لجلسات الحوش
- جلسة أرضية مرتفعة بإضاءة مخفية: مصطبة مرفوعة شوي عن الأرض، وعليها جلسة مبنية على شكل حرف L، وتحت الحافة شريط إضاءة. هالفكرة تفصل الجلسة عن العشب وتعطيها شكل "غرفة" مفتوحة.
- جلسة تحت برجولة مع جدار خلفي: برجولة فوق الجلسة، وخلفها جدار مكسي خشب أو حجر مع إضاءة جدارية. الجدار يعطي خصوصية وخلفية حلوة للصور، والبرجولة تخفف الشمس.
- جلسة زاوية بأحواض زرع: في الأحواش الصغيرة، الزاوية أفضل مكان. جلسة مبنية على جدارين، وأحواض نباتات على الحافة تفصلها عن الممر.
- جلستين بدل وحدة: جلسة كبيرة للعايلة والضيوف، وجلسة صغيرة لشخصين قريبة من المدخل أو عند نافورة. الحوش الواسع يستاهل أكثر من مكان قعدة.
- جلسة حول مكان النار أو الشوي: في الشتاء تصير هذي أكثر جلسة مستخدمة. خل الكراسي على مسافة آمنة، والمكان بعيد عن الزرع الناشف.
وإذا تبي تتعمق في فكرة الإضاءة تحديداً، اقرأ مقالنا أفكار جلسات خارجية للحوش بإضاءة مخفية.
٣. كيف تنسق الجلسة مع باقي الحوش
الجلسة الحلوة لحالها ما تكفي، لازم تكون جزء من تصميم الحوش كامل:
- الممر: خل ممر واضح من باب البيت للجلسة، بخامة تناسب أرضية الجلسة نفسها. لو الجلسة خشب، ممر بلاطات فاتحة على العشب يعطي تباين حلو.
- المسطح الأخضر: الجلسة على طرف المسطح أحسن من نصه. كذا يبقى العشب مساحة مفتوحة للعيال، والجلسة تطل عليه. ولو تحتار بين الطبيعي والصناعي حول الجلسة، شوف صفحة العشب الصناعي.
- الألوان والخامات: خل لون الكنب والمخدات قريب من لون الخشب أو الحجر في الجدار. تكرار نفس الدرجات يخلي الحوش يبان مصمم مو مجمّع.
- العنصر المائي: نافورة صغيرة أو شلال جداري قريب من الجلسة يعطي صوت هادي ويلطف الجو، بس خله على جنب مو قدام الجلسة مباشرة عشان ما يرش.
- الإضاءة: ثلاث طبقات: إضاءة مخفية تحت الجلسة، إضاءة جدارية خلفها، وإضاءة أرضية على الممر. وابعد الكشافات القوية اللي تضرب في العين.
٤. الجلسة وجو الرياض
جو الرياض يفرض عليك اختيارات معينة في تنسيق جلسات الحوش:
- الصيف: الجلسة تنستخدم بعد المغرب غالباً، فالأهم الظل خلال النهار عشان الأرضية والجدران ما تحتفظ بالحرارة. خامات فاتحة للأرضية أريح من الغامقة.
- الشتاء: الجلسة تصير نهارية، وتحتاج جهة فيها شمس الصباح، ومكان للنار أو دفاية. عشان كذا البرجولة اللي فيها شرائح تخلي شوي شمس تدخل أحسن من السقف المقفل كامل. وعندنا مقال كامل عن تجهيز الحوش للشتاء والجلسات الخارجية.
- الغبار: القماش الخارجي اللي ينفك ويتغسل أسهل بكثير، والجلسات المبنية أسهل في التنظيف من الكنب المتحرك.
٥. أخطاء شائعة في تنسيق جلسات الحوش
- اختيار الأثاث قبل المكان: تشتري كنب ما يناسب مقاس الزاوية، أو يسد الممر.
- جلسة في نص الحوش: تقسم المساحة وتخلي الحوش يبان أصغر، وتكون مكشوفة من كل الجهات.
- ما فيه ظل: جلسة جميلة بالصور بس ما أحد يقعد فيها لأن الشمس تضربها وقت الاستخدام.
- إهمال الخصوصية: الجلسة اللي يشوفها الجيران أو الشارع ما ترتاح فيها العايلة.
- ما فيه أفياش: تكتشف بعد التنفيذ إنك تبي تشغل سماعة أو إبريق أو دفاية وما فيه كهربا قريبة. خطط لها مع الإضاءة.
- أرضية بدون ميول: مية الغسيل والمطر تتجمع تحت الجلسة وتخرب الخشب والقماش.
- زرع يحتاج ري فوق الجلسة: أحواض معلقة أو نباتات ترش عليها المية تبلل الكنب. رتب الري بالتنقيط في الأحواض القريبة.
أسئلة شائعة
وش أفضل مكان لجلسة الحوش؟
المكان اللي يجيه ظل وقت ما تستخدم الجلسة، ويكون فيه خصوصية، وقريب من البيت. يختلف من حوش لحوش حسب اتجاهه، وعشان كذا نحدده في المعاينة على الطبيعة.
جلسة مبنية ولا كنب خارجي متحرك؟
المبنية أثبت وأسهل في التنظيف وتعطي شكل مرتب، والمتحرك يعطيك مرونة تغير الترتيب. كثير أحواش يناسبها خليط: جلسة مبنية أساسية وكراسي متحركة جنبها.
أقدر أسوي جلسة في حوش صغير؟
أكيد. الزاوية والجلسة المبنية على الجدار وفوقها برجولة خفيفة من أحسن الحلول للأحواش الصغيرة، لأنها ما تاخذ من المسطح المفتوح.
وش يحدد تكلفة تنسيق جلسة الحوش؟
مساحة الجلسة، وهل هي مبنية أو أثاث، ونوع الأرضية والتكسية، والمظلة أو البرجولة فوقها، والإضاءة والكهربا. عشان كذا نعطيك عرض بعد المعاينة، مو قبلها.
جلسة حوشك تبدأ بمعاينة
لو تبي جلسة تنستخدم فعلاً كل يوم، مو بس شكل، احجز معاينة مجانية وفريق الحيتان يجيك ويقترح لك مكان الجلسة وتصميمها مع باقي الحوش. شوف أفكار أكثر في صفحة الجلسات الخارجية، وتواصل معنا على واتساب 0571406373 أو اطلب عرض من صفحة طلب عرض سعر. عنواننا في الرياض: الفريان، مخرج 22.
